O Concello subvenciona a 19 entidades para axudarlles cos seus gastos correntes e os investimentos realizados durante o 2021
Ponteareas non esquece as súas casas culturais. Nun concello con 24 parroquias estas entidades son vertebradoras da cultura e da actividade social moi importantes. No Concello son ben conscientes e, por iso, acaban de conceder case 50.000 euros en subvencións para axudar aos centros a manter e a reactivar a súa actividade. Ata 19 entidades, todas as que quixeron asinar o convenio, recibirán 2.500 euros durante este ano como axuda para financiar os seus gastos correntes e os investimentos que fixeron durante o 2021.
O concelleiro de Cultura, Fernando Groba, afirma que estas axudas xorden polo “claro compromiso que temos coas casas culturas, uns dos axentes sociais máis relevantes de Ponteareas”. O edil explica que en anos anteriores a Concellaría convocaba axudas por concorrencia competitiva para apoio á cultura, pero que este ano, debido a pandemia, non se puideron realizar case actividades culturais e, por iso, apostouse por esta nova tipoloxía de axudas.
“Agardamos que estes cartos faciliten o traballo das casas culturais”, desexa a alcaldesa, Cristina Fernández Davila, ao tempo que lles promete que “sempre terán ao Concello da súa man”. A rexedora explica que ademais destas axudas tamén se destinan moitos recursos a outro tipo de actividades que dinamizan as casas culturais como o Cultura 24, un programa co que a Concellaría de Cultura procura levar a actividade cultural e de lecer ás 24 parroquias do municipio, dinamizando os centros culturais e o propio tecido creativo da vila.
As casas culturais que recibirán unha axuda son as seguintes: Centro cultural Xinzo, Centro cultural Cotarel (Arnoso), Casa cultural de Areas, Centro cultural de Guláns, Casa cultural Antorcha (Cristiñade), Casa cultural de Angoares, Casa cultural de Moreira, Centro cultural de San Mateo, Centro cultural de Ribadetea, Centro cultural de Cillarga, Centro cultural Irmáns Barcia (Padróns), Casa cultural de Bugarín, Casa cultural de Prado, Centro cultural de Fozara, Casa cultural de Arcos, Centro cultural de Cumiar, Centro cultural de Guillade, Centro cultural Os Muíños de Oliveira e Centro cultural de Celeiros.