O Concello de Ponteareas, en base ás propostas realizadas polos diferentes colectivos e asociacións, acordou, por unanimidade dos representantes dos mencionados colectivos, conceder os premios “Concello de Ponteareas 2013” ás seguintes empresas, institucións ou colectivos:
- No eido Empresarial, á empresa Covelo, (matriz das actuais), como recoñecemento á súa contribución ao desenvolvemento económico de Ponteareas, sendo referencia no transporte, escavación e venda de materiais vinculados co sector da construción na comarca do Condado.
- No eido Social, ao Colexio Santiago Apóstol, como recoñecemento ao labor social que vén desenvolvendo nesta localidade desde o ano 1945, sendo o primeiro centro que ofertou o antigo Bacharelato nesta vila.
- No eido Deportivo, a Enrique Freitas Andrade, como recoñecemento á traxectoria deportiva deste atleta que, portando o escudo da S. D. Juvenil, foi quen de situar a Ponteareas en postos de honra dentro desta práctica deportiva.
- No eido Comercial, ás Peixeiras de Xinzo, como recoñecemento público ao labor comercial desempeñado por varias xeracións destas incansables traballadoras que promoveron un importante desenvolvemento económico e comercial na nosa vila.
- No eido Cultural, á Coral do Centro Artístico Sportivo, como recoñecemento á súa extraordinaria contribución ao patrimonio musical e cultural da nosa comarca ao longo de preto de 50 anos, sendo canteira de grandes voces.
O acto solemne de entrega dos premios “Concello de Ponteareas 2013” terá lugar no Auditorio Reveriano Soutullo, hoxe sábado, día 3 de maio ás 21,30 horas.
O alcalde de Ponteareas, en nome da Corporación Municipal, quere facer partícipe destes premios a todos os familiares e amigos dos agasallados e tamén a todos os veciños e veciñas da localidade.