O acto celebrouse no Auditorio Reveriano Soutullo e contou coa presenza do alcalde e da concelleira de Benestar Social
O Auditorio Reveriano Soutullo foi testemuña da cerimonia de clausura do curso escolar 2014/2015 na Escola Infantil Municipal de Ponteareas. O acto serviu para que os cativos e cativas de entre 2 e 3 anos recibiran os seus respectivos diplomas de graduación, ademais dunha planta que foi sementada por eles mesmos durante o curso.
O eventou tamén contou coa reprodución dun vídeo que pretendeu ser un resumo das actividades que o alumnado, sempre acompañado dos mestres e mestras da Escola, desenvolveu ao longo de todo o ano académico.
Os pais dos cativos asistentes tiveron a oportunidade de escoitar as intervencións do alcalde de Ponteareas, Xosé Represas, da directora do centro, Leticia García e da concelleira de Benestar Social, Verónica Carrera.
A edil ponteareá quixo salientar “o labor dos traballadores da escola e, asemade, agradecer a confianza depositada por parte dos pais e das nais nesta entidade”. Carrera sinalou que dende a concellería que dirixe “somos plenamente conscientes da demanda existente por parte doutras familias para conseguir unha praza na Escola Infantil, por iso traballaremos para facer realidade a apertura dunha nova escola na vila”. A Escola Municipal Infantil contou este pasado curso con 119 nenos matriculados.
