O desfile de comparsas de Entroido, que terá lugar o domingo, día 15 de febreiro contará con máis de 800 persoas desfilando polas rúas da vila de Ponteareas, feito que obriga ao Concello a introducir cambios no percorrido inicialmente previsto.
Dado que se pasou dunha participación de 10 ou 11 comparsas nos últimos anos a un total de 16 comparsas inscritas nesta edicción, o concelleiro de Cultura, Andrés Sampedro Fernández, acordou cos representantes das comparsas modificar e facer máis grande o percorrido que terán que realizar as comparsas o domingo, día 15 de febreiro.
Deste xeito, a saída será, este ano, dende o pavillón cuberto do colexio Virxen dos Remedios percorrendo as seguintes rúas: Rosalía de Castro, Concha Brey, Constitución, Praza de Bugallal, Oriente, Praza Maior, Arxentina, Doutor Fernández de la Vega, Reveriano Soutullo, Constitución, Praza de Bugallal, Oriente e remate na Praza Maior onde se procederá á lectura das coplas.
Compre lembrar que, de acordo coas bases, cada comparsa percibirá 200 euros en concepto de participación e establécense os seguintes premios: 1º premio de 500 euros; 2º premio de 300 euros; 3º premio de 200 euros e 4º premio de 100 euros.
O Concello de Ponteareas tamén concederá un premio especial de 300 euros á mellor comparsa en representación das parroquias de Ponteareas.
O xurado do concurso de comparsas de Ponteareas estará integrado por un representante de cada unha das comparsas inscritas, e varios representantes de colectivos e asociacións culturais de Ponteareas.
Descarga o programa do entroido 2015 (96.3 KiB)