O espectáculo de Dani García encherá de maxia o Multiúsos do Auditorio Municipal o venres 7 de outubro ás 18.00 horas
A entrada é de balde ata completar aforo
O Festival Galicia Ilusiona, patrocinado por Turismo de Galicia a través do Xacobeo 21-22, continúa o seu percorrido por cada recuncho das catro provincias e este venres 7 de outubro fará unha parada na vila do Tea.
O Multiúsos do Auditorio Municipal de Ponteareas acollerá, dende as 18.00 horas, a actuación de Dani García, un dos magos de rúa máis prestixiosos do panorama nacional. Os seus espectáculos semellan estar inmersos nunha obra de teatro á que se sumaron os mellores efectos máxicos. Trátase dun artista que é quen de, sen falar, sorprender a todas e todos os asistentes. Mestura a mímica cos efectos máis novidosos e cunha maxia dinámica, divertida e xuvenil.
Fernando Groba, Concelleiro de Cultura, asegura que “esta é unha oportunidade única e animo a toda a veciñanza a que goce desta xornada maxia para todos os públicos na vila que de seguro que non deixará a ninguén indiferente”.