O alcalde de Ponteareas, Salvador González, e o concelleiro de Cultura, Andrés Sampedro, presentaron hoxe as actividades do “Mes de Maio, Mes das Letras”, que se levará a cabo durante todo o mes de maio.
Este xoves, día 7 de maio, arrancan as actividades programadas polo Concello de Ponteareas dentro do “Mes de Maio, Mes das Letras”. A primeira actividade de fomento do uso do galego vai dirixida ao sector infantil e terá lugar o xoves, día 7 de maio, na Biblioteca Pública Municipal, ás 18 horas, onde os nenos poderán gozar dun espectáculo de maxia denominado “Maxia vs Ciencia”, a cargo do mago Paco.
O venres, día 8 de maio, o Parque da Perillana será o escenario onde se desenvolva o Día do Espantallo, onde a partir das 17:30 horas, haberá exposición de espantallos elaborados polo alumnado de infantil dos centros de ensino de Ponteareas e festa de animación infantil con música e moitas sorpresas.
As actividades de difusión do galego estarán dirixidas tanto aos máis pequenos como a toda a poboación en xeral e a diversos sectores. Xunto as diversas actividades de animación infantil dirixidas ao fomento do galego entre os máis cativos, os ponteareáns poderán achegarse á figura do escritor homenaxeado Xosé Filgueira Valverde, mediante a conferencia impartida por Carlos Valle Pérez, director do Museo de Pontevedra, quen disertará baixo o título “Xosé Filgueira Valverde: unha valoración”. Ponteareás difundirá tamén o Día das Letras Galegas e ao homenaxeado no Centro Asprodico, onde os asistentes aos talleres de adultos poderán coñecer a figura do
homenaxeado. Poderase tamén contemplar a exposición “Mulleres galegas na historia”, da Deputación de Pontevedra, onde se destacan mulleres que fixeron historia, exposta desde o día 15 de maio na Biblioteca Pública Municipal. Igualmente, os ponteareáns poderán achegarse a vida e obra de Filgueira Valverde mediante a exposición de
Carteis sobre o homenaxeado durante todo o mes de maio na Bbiblioteca Pública Municipal.
O Día das Letras Galegas a Praza Maior será o escenario de distintas actividades, tanto deportivas, como espectáculos dirixidos ao público familiar, como de exaltación do folclore tradicional. Comezarán as actividades pola mañá, ás 10:30 horas coa Festa da Bicicleta, coa marcha ciclista popular a Mondariz Balneario e ás 12:00 os máis cativos poderán gozar dun Galeoke, onde a música, as cancións de Karaoke, os bailes e os xogos tradicionais deleitarán a todos os asistentes. Pola tarde, ás 18 horas, o público poderá asistir ao espectáculo “Dous pallasos en máis apuros”, a cargo do coñecido grupo “Os sete magníficos máis un”. A xornada festiva terá como colofón o pasacalle e actuación na Praza Maior do Grupo Folclórico e de Pandeireteiras San Salvador de Padróns, os que achegarán o folclore tradicional e o baile a Ponteareas.
As actividades do mes de maio rematarán o día 29 de maio, venres, coa celebración do “II Encontro de escritores en lingua galega de temática ponteareá, baixo o lema: “importancia de difundir o local”, no que se afondará sobre a creación literaria.
O comercio local será tamén obxecto de difusión do galego mediante a campaña “Agasalla galego” a través da cal se repartirá ao comercio tradicional etiquetas adhesivas en galego para os regalos. Esta campaña iniciada hai anos lévase a cabo en colaboración co Equipo de Normalización e Dinamización Lingüística do IES Val do Tea.