As doazóns producíronse maioritariamente nos diferentes eventos deportivos con carácter solidario que se celebraron en Ponteareas no último mes
O Centro de Reparto de Alimentos do Concello de Ponteareas recibiu un total de 2.763 quilogramos de alimentos e produtos de primeira necesidade ao longo do último mes. Estas doazóns producíronse, maioritariamente, en diferentes eventos deportivos con carácter solidario celebrados en Ponteareas nos meses de xaneiro e decembro.
O campionato de tute, a andaina histórica, a sesión de zumba, o torneo de xadrez e o campionato de billar, organizados pola Escola de Billar Sportivo, o Club de Xadrez Ramiro Sabell e nos que colaborou o Concello de Ponteareas, conseguiron xuntar un total de 461 quilogramos de alimentos non perecedoiros.
A cuarta edición San Silvestre Solidaria, organizada polo Club Taninos Runners, celebrada o pasado 31 de decembro e na que tamén colaborou o Concello, recadou 1.706 quilogramos de comida e produtos de hixiene e limpeza.
Por último, o maratón solidario promovido polo Concello de Ponteareas, o Club Natación Ponteareas e Insdega XXI (empresa xestora da piscina municipal) recadou un total de 367 quilogramos o pasado 4 de xaneiro.
Máis aportes
Estas datas tamén serviron para que outras entidades aportaran importantes cantidades de alimentos e produtos de primeira necesidade. Este é o caso do IES Ponteareas, que recadou 101 quilogramos, e do Convento de Canedo, que xuntou un total de 128 quilogramos.
Tamén xoguetes
Dende o Centro de Reparto de Alimentos do Concello aseguran que “a recepción de xoguetes tamén foi espléndida, até o punto de que aínda non tivemos tempo de contabilizalos, pero é posible asegurar que recibimos máis de 400 ao longo do últimos mes”.
Satisfacción
Tanto o concelleiro de Deportes, Benito Márquez, como o de Servizos Sociais, Manuel Troncoso, mostráronse “altamente satisfeitos polo resultado obtido, que demostra o carácter solidario da veciñanza de Ponteareas e que permitirá axudar a moitas persoas que realmente precisan este tipo alimentos”.