A Axencia Galega da Industria Forestal cedeu ao Obradoiro de Conservación Forestal un simulador que recrea o funcionamento dunha procesadora e unha autocargadora
O alumnado do obradoiro de Conservación Forestal que se está a celebrar no Centro de Desenvolvemento Local de Ponteareas iniciouse no manexo dunha procesadora e dun autocargador grazas ao simulador de realidade virtual cedido estes días pola Axencia Galega da Industria Forestal (Xera) a través da Escola de Enxeñaría Forestal da Universidade de Vigo. “Utilizar esta ferramenta permítenos que o persoal se familiarice coa maquinaria dun xeito moi preciso, mellorando as súas habilidades e ofrecéndolles unha completa preparación para levar a cabo o seu traballo”, salienta a concelleira de Formación e Emprego, Vanesa Fernández Soage.
Este simulador, cedido dende o pasado 15 de xuño ata este luns 27, recrea tanto nunha pantalla como nuns lentes de realidade virtual o funcionamento dunha procesadora John Deere co seu mesmo cadro de mandos, achegando información da cantidade, do diámetro e da lonxitude da madeira cortada, ademais doutros datos como a produción por hora, o gasto de combustíbel ou as posíbeis avarías que se poidan ir xerando durante o proceso.
Grazas ao préstamo deste simulador “mellórase o adestramento dos futuros operarios e operarias no manexo dunha maquinaria altamente produtiva, pero tamén permite afinar habilidades e se converte nunha ferramenta moi importante para reducir a siniestralidade laboral”, como destaca a edil.