O alcalde de Ponteareas, xunto co concelleiro de Cultura, representantes do Club Taninos Runners Ponteareas e patrocinadores, presentaron este venres na Casa do Concello a III San Silvestre Solidaria, que terá lugar o día 31 de decembro en Ponteareas.
Esta carreira solidaria, organizada conxuntamente polo Concello de Ponteareas e “Taninos Runners”, consistirá nunha proba non competitiva e solidaria cun percorrido polo centro urbano, de 5 Km, e na que poderán participar todos aqueles que o desexen, desde os oito anos en diante. Este ano conta coa novidade da celebración da San Silvestre Solidaria Infantil que contará con dúas categorías: unha para nenos e nenas de 8, 9 e 10 anos (nados nos anos 2004, 2005 e 2006), cun percorrido dunha volta ás dúas prazas de Ponteareas, saíndo ás 16:45 horas e, outra, para rapaces e rapazas con 11, 12 e 13 anos (nados nos anos 2001, 2002 e 2003), cun percorrido de dúas voltas ás dúas prazas de Ponteareas, coa saída ás 17:00 horas. O resto dos participantes tomarán a saída ás 17:30 horas.
Para poder participar nesta iniciativa deportiva solidaria, os interesados poderán facer a inscrición ata o día 29 de decembro no enderezo taninosponteareas@gmail.com. A inscrición é gratuíta e aqueles que o desexen poderán facer unha achega voluntaria de comida non perecedoira a favor do Centro de Reparto de Alimentos do Concello de Ponteareas.
O Concello de Ponteareas quere animar a todos os seus veciños a participar neste evento deportivo no que , ademais, se colaborará para que, grazas a achega solidaria de alimentos, moitas familias que están atravesando malos momentos, poidan pasar un pouco mellor, se cabe, as festas de Nadal
