O Concello impulsou a creación da organización e anima a todas as entidades e colectivos a defender unha atención sanitaria de calidade
Nace a Plataforma en defensa da sanidade pública en Ponteareas como resposta á continua degradación e empeoramento do servizo de atención primaria no Centro de Saúde do municipio. O obxectivo desta organización, plural, apartidista, e representativa, é a de reinvindicar máis medios materiais e sobre todo humanos, para que a veciñanza de Ponteareas poida recibir un servizo asistencial de calidade.
O Concello impulsou a creación da Plataforma e anima a todas as entidades e colectivos a unirse a ela nunha reunión inicial este venres 13 ás 20.30 horas na Sala Multiusos do Auditorio. Ademais, a alcaldesa e concelleira de Saúde de Ponteareas, Cristina Fernández Davila, mostrou o seu apoio á concentración convocada pola veciñanza mañá ás 20.00 horas diante do Centro de Saúde do municipio.
A atención primaria en Ponteareas presenta unha falta de recursos materiais e humanos que cada vez son máis preocupantes. Dende o 15 de agosto ata ao 15 de setembro as axendas programadas para as tardes foron anuladas polo Sergas debido a falta de persoal facultativo que poda substituír baixas ou vacacións. A veciñanza ten a opción de cambiar a cita para a quenda de mañá, ou adiala para despois do 15 de setembro. Mentres que todas as urxencias serán derivadas ao PAC. Para a alcaldesa, “non é aceptable que moitos veciños e veciñas teñan que aprazar todas aquelas revisións ou probas que non se precisen de xeito inmediato”.
Cristina Fernández Davila lembra que en “numerosas ocasións” o Concello reclamou unha solución á falta de servizos e persoal sanitario, a última o venres pasado coa entrega das súas demandas a Xerencia do Sergas, pero que, polo de agora, a situación continúa no mesmo punto. Por iso, tanto o Concello como colectivos e veciñanza deciden crear a Plataforma para reclamar “a atención sanitaria que merece Ponteareas”.