Os traballos, promovidos pola concellaría de Vías, Obras e Alumeado, foron cofinanciados ao 80% polo IDAE
Supuxo unha mellora do aforro enerxético e da seguridade cidadá que beneficiou ás e aos 2.396 habitantes de Paredes, Padróns, Fozara, Ribadetea, Xinzo, Arnoso e Areas
As parroquias de Ponteareas presumen de novo alumeado. Ao abeiro do proxecto de renovación das instalacións de alumeado público exterior municipal, o Concello xa rematou a renovación total de practicamente o 100% dos cadros de mando e de case 2.500 puntos de luz nas parroquias de Paredes, Padróns, Fozara, Ribadetea, Xinzo, Arnoso e Areas, así como máis de 5.500 metros de cable que non estaba en boas condicións. Unha cifra superior aos 36 cadros e 2.336 luminarias necesarias inicialmente para conseguir unha infraestrutura nesta zona segura e eficiente enerxeticamente que, como salienta a concelleira de Vías, Obras e Alumeado, Chus Garrote, “amosan a nosa aposta continua polo rural do Goberno local do BNG-PSOE, tamén no alumeado, xa que cando iniciamos o proxecto de remodelación das luminarias públicas consideramos prioritario comezar polas parroquias”.
A renovación do alumeado nestas sete parroquias beneficia ás e aos seus 2.396 habitantes, mellorando o aforro enerxético e a seguridade cidadá en todas elas. O proxecto foi cofinanciado ao 80% por fondos do Instituto de Diversificación y Ahorro Energético (IDAE) do Ministerio para la Transición Ecológica y el Reto Demográfico. Nestas sete parroquias tamén se cambiaron proxectores ornamentais e retiráronse algúns postes que se atopaban en malas condicións.
As luminarias elixidas contan cunha tecnoloxía pioneira que se “anticipa ás tendencias futuras en iluminación viaria que xa se están empezando a esixir para acceder a determinadas subvencións derivadas de Europa”, salienta Garrote. A través destas novas luminarias conséguese unha redución importante da luz esparexida á atmosfera, diminuíndo a contaminación luminosa e favorecendo o confort e a saúde das persoas.
O proxecto de renovación das instalacións de alumeado exterior municipal na Zona Rural 1 supuxo un investimento de máis de 1,1 millóns de euros cofinanciados ao 80% ao abeiro da liña de axudas a proxectos de Economía Baixa en Carbono, promovidos por entidades locais, cofinanciada con fondos FEDER e xestionada polo IDAE co obxectivo de conseguir unha economía máis limpa e sostible. A renovación nestas sete parroquias ponteareás, como explica a alcaldesa, Cristina Fernández, “permitirá un aforro do 68% na emisión de CO2 e un aforro económico do 71% ao Concello no investimento en enerxía, ademais de mellorar a seguridade cidadá para circular polas rúas en horas nas que xa non hai luz natural”.