O venres 31 de marzo ás 20.00 horas terá lugar no Salón de Plenos do Concello de Ponteareas unha conferencia de achegamento ao autor, centrándose na súa faceta como etnógrafo
Esta xornada correrá a cargo de D. Xosé Manuel González Reboredo, especialista en Antropoloxía cultural quen, baixo o título “Fermín Bouza Brey, un destacado etnógrafo visto por un discípulo”, que afondará na personalidade desta gran figura da literatura e cultura galegas; o investigador David Sánchez, gañador da sexta edición do Premio de Investigación Fermín Bouza Brey; e a intervención de poética e músical de Kneves no Autoblues Chicago-Fornelos.
Xosé Manuel González Reboredo foi director da Sección de Etnografía do Instituto de Estudos Galegos “Padre Sarmiento”, membro da Sección de Antropoloxía do Consello da Cultura Galega, e do Consello de Cultura da Exma. Deputación Provincial de Lugo. Na actualidade é Presidente da Xunta Rectora do Museo do Pobo Galego (Santiago de Compostela) e académico correspondente da Real Academia Galega. No ano 2012 foille concedido o Premio Vicente Risco de Ciencias Sociais pola monografía “Os santos titulares de parroquia en Galiza.”
Tamén intervirá na xornada o gañador da sexta edición do Premio de Investigación Fermín Bouza Brey, David Sánchez co traballo “Unha aproximación ó contrabando na comarca do Condado no século XX”. No transcurso do acto daranse a coñecer as novas bases do VII Premio Bouza Brey . Amenizará a tardiña a intervención poética e musical de Kneves no Autoblues Chicago-Fornelos.
Este acto ten como obxectivo homenaxear e difundir a obra e figura do insigne escritor ponteareán entre a poboación en xeral de Ponteareas, para por en valor e dar a coñecer os nosos escritores máis ilustres.