O acto contou coa presenza da concelleira de Benestar Social, Verónica Carrera, e do alcalde ponteareán, Xosé Represas
A coñecida como “Festa do Avó” non se celebraba dende hai catro anos, polo que o goberno municipal apostou por retomar unha actividade que serve como mostra de respecto ás persoas maiores do concello
Os xardíns da residencia ponteareá Santa Ana foron testemuña da homenaxe que os maiores e as maiores da vila do Tea recibiron de parte de varios representantes do goberno local, entre os que estaban a concelleira de Benestar Social, Verónica Carrera, e o rexedor municipal, Xosé Represas.
Catro anos máis tarde da última “Festa do Avó”, máis de 80 persoas, usuarias da residencia de maiores Santa Ana, do centro de día e socios da Asociación de Maiores de Ponteareas, puideron gozar dunha sesión vespertina con merenda, cea, coloquio e mesmo baile para amenizar unha xornada que rende unha merecida homenaxe ás persoas maiores do municipio.
A concellería de Benestar Social escolleu a véspera do Día de Galicia para organizar un acto no que tamén participaron os traballadores e as traballadoras que acompañan no día a día aos maiores e ás maiores de Ponteareas.