Os traballos prolongaranse durante todo o mes de maio de cara a que, ao comezo do bo tempo, as zonas de lecer estean nas mellores condicións posibles para o goce dos veciños e veciñas
A Concellería de Medio Ambiente, que xestiona o alcalde Xosé Represas, vén de poñer en marcha un programa integral de limpeza de beirarrúas e zonas peonís que se desenvolverá durante todo o mes de maio.
O labor, iniciado xa pola empresa concesionaria Fomento de Construcións e Contratas, abranguerá todas as rúas e zonas peonís do núcleo urbano. O alcalde de Ponteareas e concelleiro de Medio Ambiente sinalaba que os traballos “permitirán que o casco urbano presente o seu mellor aspecto”.
No mesmo sentido subliñaba que entre os labores que se realizarán “eliminarán non só a sucidade, senón tamén o verdello existente nas zonas máis sombrías das zonas peonís e espazos de lecer”.
Fixo especial fincapé o rexedor ponteareán, no feito de que para os traballos a desenvolver, utilizarase a maquinaria máis axeitada segundo a superficie de que se trate, “de xeito que algunhas zonas serán limpadas con auga a presión, mentres que noutras será precisa a utilización de decapadora”.
En todo caso, asegurou Xosé Represas, “utilizaranse medios absolutamente respectuosos co medio ambiente”.
de Ponteareas