Os dous traballadores contratados polo Concello de Ponteareas velan pola seguridade dos veciños e veciñas que se bañan no río ao longo destes meses estivais
Os dous traballadores contratados polo Concello de Ponteareas para vixiar aos bañistas da Freixa durante os meses de verán están dende esta semana traballando na praia fluvial ponteareá.
O alcalde ponteareán, Xosé Represas, e o concelleiro de Deportes, Benito Márquez, achegáronse até a área recreativa para facerlles entrega das camisetas oficiais coas que desenvolverán o seu labor. A contratación deste servizo de socorrismo, que estará activo de luns a domingo en horario de 12:30 a 20:00 horas, prodúcese grazas a unha subvención da Consellería de Traballo e Benestar da Xunta de Galicia que conta co apoio do Fondo Social Europeo.
Os contratos teñen unha duración de 3 meses, sendo a xornada completa e baixo a modalidade de “contrato de traballo de duración determinada de interese social”. As retribucións serán as correspondentes á categoría de Socorrista no Convenio Colectivo do Concello de Ponteareas. O consistorio contou tamén coa colaboración de Insdega XXI, empresa concesionaria da xestión da piscina municipal.