Os Reis Magos visitaron Ponteareas facendo, nesta ocasión, unha viaxe especial na que quixeron achegarse a todos os fogares. As súas maxestades repartíronse para poder visitar as parroquias de Ponteareas e gozar do cariñoso recibimento da veciñanza que non dubidou en convidalos a tornar para o ano. Cativos e maiores recibiron das mans dos Reis caramelos e agasallos.
Dende o día 2 os Reis Magos realizaron un percorrido por todo o concello acompañados dos seus paxes e do voluntariado de Protección Civil que garantíu o bo desenvolvemento das visitas.
Nas parroquias os máis pequenos e pequenas entregaron as súas cartas e os maiores lembraron aqueles tempos de mocidade nos que os Reis tamén visitaban o rural.
No centro urbano os Reis Magos recibiron ás familias no complexo deportivo Álvaro Pino acompañados de novidosa animación de rúa e da tradicional danza de reis do Rancho de Reis de Santiago de Oliveira.Na entrada seguíuse un rigoroso control con toma de temperatura, xel desinfectante e curtas esperas nas que se mantivo a distancia de seguridade sanitaria.
Aínda que por mor da crise sanitaria non se puido celebrar a habitual cabalgata de Reis o Concello quixo que as familias puideran gozar deste especial encontro mantendo sempre as medidas de prevención e facilitou a visita das súas maxestades dun xeito ordenado.
O Concello agradece a colaboración do voluntariado de Mocidade, dos traballadores municipais e do servizo de Protección Civil Ponteareas así como o dos taxistas.