A inscrición é de balde e xa están confirmados o Celta de Vigo, o Deportivo, o Lugo, o Pontevedra o Porto ou o Spanish Soccer School de Dubai, entre outros equipos
O partido Celta de Vigo-Deportivo da Coruña pecha o torneo o vindeiro día 25 de agosto
O concello de Ponteareas acollerá o I Torneo Internacional MS2 Cup (Michel Salgado) que terá lugar do 15 ao 25 no campo municipal de Pardellas nas categorías de prebenxamín, benxamín, alevín, infantil e cadete.
A organización informa que os equipos interesados poden inscribirse totalmente gratis ata o 5 de agosto no número de teléfono 639 30 30 35 ou no enderezo electrónico ricardofreire66@hotmail.com
A día de hoxe xa está confirmada a inscrición do Celta de Vigo, do Deportivo da Coruña, do Porto (Portugal), do Spanish Soccer School (Dubai), do Lugo, do Pontevedra, do Lérez, do Victoria de Santiago, do Val Miñor, do Oroso de Santiago, do Choco, do Vila do Corpus, do Porriño Industrial, do Santa Marina e do Rápido de Bouzas, entre outros equipos chegados de todo o territorio galego e de distintos estados do estranxeiro.
O día 25 de agosto os espectadores gozarán do espectáculo do fútbol cun Celta de Vigo-Deportivo da Coruña na categoría de veteranos.
As finais serán os días 18, 24 e 25 dependendo da categoría.
Por outro lado, por segundo ano consecutivo o alumnado da escola de fútbol MS2 que dirixe Michel Salgado chegará o vindeiro día 13 para adestrar a diario no campo de Pardellas.
O concello de Ponteareas a través da concellería de Deportes en colaboración co resto das concellerías colaborará no desenvolvemento deste torneo que congregará a centos de cativos e cativas chegados de distintos puntos do mundo.