Catro alumnos do Conservatorio de Música Reveriano Soutullo de Ponteareas logran o primeiro posto nas probas de acceso ao Grao Superior en distintos conservatorios superiores de música de España, en Vigo, Oviedo e Badajoz.
Andrea Rubio Gómez, alumna de violín, acadou o número 1 nas probas de acceso ao Grao Superior no Conservatorio Superior de Música de Vigo e A Coruña, quedando primeira nas probas de acceso ao grao superior de toda Galicia, rematando, así mesmo, o Grao Profesional co Premio Fin de Grao e Matrícula de Honor no Conservatorio Reveriano Soutullo de Ponteareas, na especialidade de violín.
Adrián Alonso Pereira, alumno de percusión, acadou o primeiro posto nas probas de acceso ao Grao Superior no Conservatorio Superior de Música de Vigo. Así mesmo, finalizou o Grao Profesional no Conservatorio Reveriano Soutullo de Ponteareas co Premio Fin de Grao na especialidade de percusión.
Juan Antonio Vázquez Mouzo, alumno de percusión, logrou o posto número 1 nas probas de acceso ao Grao Superior no Conservatorio Superior de Música de Oviedo.
Xoel González González, alumno de percusión, obtivo o 1º posto nas probas de acceso ao Grao Superior no Conservatorio Superior de Música de Badajoz.
O concelleiro de Cultura, Andrés Sampedro Fernández, felicitou os alumnos e o director do Conservatorio, Rafael Pérez Dopeso, en representación da comunidade educativa, e salientou que o éxito acadado polos alumnos do Conservatorio Reveriano Soutullo de Ponteareas pon de manifesto a calidade do ensino e do profesorado do citado conservatorio. Considera que é un orgullo para o Concello de Ponteareas que alumnos do seu conservatorio destaquen a nivel nacional, o que vén reafirmar que ao longo dos tempos Ponteareas é un pobo de músicos, onde naceron importantes mestres e compositores de recoñecido prestixio.