Nos últimos 5 anos a reciclaxe en Ponteareas creceu case un 13%. O novo modelo irase implementando no centro da vila e nas parroquias a medida que se vaian realizando intervencións nas rúas
O Concello continúa traballando para facer de Ponteareas unha vila máis sostible. Neste camiño, acaba de poñer en marcha un novo modelo de illas de reciclaxe coa que mellorar non só a xestión, senón tamén os espazos de recollida de residuos. “Queremos converter a nosa vila nun modelo en materia medioambiental. Separar correctamente en orixe implica unha maior recuperación do material a reciclar e menos restos a incinerar, reducindo o impacto ambiental que supón e os custes municipais de transporte e tratamento”, salienta a alcaldesa, Cristina Fernández Davila.
A instalación deste novo modelo comezou pola rúa Redondela, onde se modificaron xa as illas de reciclaxe tanto ao final da rúa como na zona de confluencia coa Avenida Rosalía de Castro. Son modelos de colectores cunha estrutura máis robusta que os actuais contedores e con indicacións máis claras dos restos que se deben botar en cada espazo, “achegando á veciñanza a maior información posible para que reciclar os residuos que xeramos sexa moito máis doado”, como explicou a concelleira de Medio Ambiente, Rosa Covelo. As novas illas de colectores irán implementándose tanto no centro da vila como nas parroquias a medida que se vaian realizando intervencións nas diferentes rúas.
As e os ponteareáns amosaron nos seus últimos anos tamén o seu compromiso coa sostibilidade. Nos últimos cinco anos incrementouse en case 13 puntos a porcentaxe de residuos reciclados, chegando ás máis de 911 toneladas de restos recollidas ao longo do ano 2021, máis de 323 da fracción vidro, case 296 de envases e outras 293 de papel e cartón.
A estes datos hai que sumar os do servizo de recollida de mobles e trastes vellos, que o pasado ano acudiron a case 2.300 puntos dos que retiraron dende colchóns ou mobles ata madeiras ou metálicos, entre outros. O Concello ten a disposición da veciñanza unha liña de teléfono para solicitar a recollida deste tipo de residuos. Chamando ao 986 64 03 07 os e as traballadoras do servizo indicarán día e hora para depositar na rúa estes residuos, permitindo así unha recollida ordenada e sostible.