Unha nova medalla para o deporte ponteareán, esta vez na modalidade de billar
A xogadora da Escola de Billar Centro Artístico Sportivo de Ponteareas, Carolina Represas, de tan só 15 anos de idade, logrou esta fin de semana unha meritoria medalla de bronce na II Copa España Feminina, proba na que participaron as mellores xogadoras de España de billar.
Dende o club explican que a única partida que perdeu Carolina foi xustamente fronte á xogadora catalá Silvia López, que foi a gañadora da proba.
As xogadoras do club Diana Álvarez, de 14 anos, e Enma Álvarez, de 12, demostraron na súa participación un grande nivel a pesar da súa corta idade e experiencia.
A Escola do Billar Centro Artístico Sportivo de Ponteareas salienta a valentía de todas estas xogadoras que superaron os medos da pandemia e conseguiron tan bos resultados. O Club agradece tamén aos organizadores o bo desenvolvemento da Copa de España cumprindo con todos os protocolos de prevención fronte á COVID.
O concelleiro de Deportes en funcións, Miguel Bouzó, en nome de todo o goberno local, traslada os seus parabéns “a todas as xogadoras, en especial a Carolina Represas polo seu bronce, así como ao club polo traballo que desenvolve na formación de novos valores do deporte do billar”.
O Billar Centro Artístico Sportivo adianta que a vindeira fin de semana algúns dos seus deportistas trasladaranse a xogar a Copa de España Masculina que se celebrará en Salamanca.
