O Concello de Ponteareas estará presente este venres, día 30 de xaneiro, un ano máis da man de Turgalicia no maior escaparate para o mundo que é Fitur, Feira Internacional de Turismo, onde Ponteareas terá a oportunidade de promocionar a súa vila como un destino de calidade de primeira orde, promocionando a súa festa singular, o Corpus Christi, como o reclamo turístico máis importante, así como poñendo en valor os seus recursos turísticos como son a natureza, a cultura, o patrimonio e as súas festas para que a través da difusión no sector turístico poida ser escollida como destino de futuros viaxeiros que se acheguen para coñecer a vila do Corpus.
Neste evento, o Concello de Ponteareas, a través do concelleiro de Turismo, Andrés Sampedro Fernández, explicaralles aos profesionais do sector turístico que se dan cita na feira madrileña a importancia do Corpus Christi, Festa de Interese Turístico Internacional, que fai que cada ano se acheguen ata a Vila do Corpus milleiros de persoas procedentes de toda Galicia e tamén do resto de España, así como do norte de Portugal que desexan contemplar e admirar unha vila convertida en poucas horas nun inmenso tapiz floral.
Para tal fin, promocionarase a festa do Corpus Christi de xeito visual a través dun vídeo no que poderán asistir en vivo á celebración do Corpus desde o día antes, coa preparación das rúas desde o inicio ata o completo tapizado floral, así como asistir o día propio á procesión do Santísimo e á explosión de pétalos que rocían a custodia ao seu paso procesional. Igualmente, estarán a disposición dos visitantes todo tipo de folletos promocionais tanto da festa que singulariza a Ponteareas, como dos seus atractivos turísticos, así como se ofrecerá a degustación do elemento gastronómico que representa á Vila do Tea, as famosas rosquillas de Ponteareas.