Ponteareas continúa coas actividades de animación á lectura nas parroquias. A Axencia de Lectura Municipal de Guillade acollerá unha nova actividade de animación á lectura a través do contacontos “Maxia Cómica” realizada pola maga Leo Leiliño. Esta actividade terá lugar na citada axencia o martes, día 21 de abril, ás seis da tarde, destinada a todos os públicos, especialmente para os nenos a partir de tres anos. Trátase dunha actividade divertida e sorprendente aderezada cunha importante dose de humor. Na sesión mestúrase trucos divertidos para pequenos e adultos, maletas cheas de segredos e tesouros e libros máxicos de sabores sorprendentes.
Esta actividade encádrase dentro das actividades do programa “Ler Conta Moito” da Consellería de Cultura da Xunta de Galicia, programadas pola Concellería de Cultura do Concello de Ponteareas, coa finalidade de difundir a lectura entre os máis pequenos e fomentar os hábitos lectores.
O edil de Cultura do Concello de Ponteareas, Andrés Sampedro Fernández, quere animar a todos os veciños de Guillade a achegarse ata a Axencia de Lectura para gozar desta actividade pensada para promover a lectura, dentro das actividades de programadas pola Concellería de Cultura co gallo do Día Internacional do Libro Infantil, o Día Mundial da Propiedade Intelectual e Día Internacional do Libro, que se conmemoran no mes de abril.