O goberno presenta a transformación do Paseo Matutino

O Alcalde de Ponteareas, Xosé Represas, e a Tenente de Alcalde e Concelleira de Vías e Obras, Chus Garrote, reuníronse con hostaleiros, comerciantes, comunidades de propietarios e veciños do Paseo Matutino para expor o proxecto de transformación do primeiro tramo da rúa.
A actuación no primeiro tramo conta cun orzamento de 178.000€ e comprende unha completa reforma da rúa dende o cruce coa Avda de Galicia con Rogelio Groba ao cruce coa rúa Castañal.
O novo proxecto de reforma para o primeiro tramo do Paseo Matutino actuará sobre toda a plataforma e non só as beirarrúas e tamén contempla obras no alumeado público da zona así como a separación de pluviais das augas residuais.
“Esta transformación radical suporá unha modernización que beneficiará aos veciños e negocios. A rúa quedará toda ao mesmo nivel, en plataforma única que permitirá o paso de vehículos, e primará o tránsito peonil con amplias beirarrúas. Será un espazo agradable seguindo as premisas prantexadas no estudo de Mobilidade e de acorde ás liñas marcadas pola estratexia Ponteareas Hábitat Saudable”, explica o Alcalde.


Esta actuación será un dos primeiros exemplos do modelo de cidade hacia o que camiñará Ponteareas, e que marcará o modelo de actuacións noutros espazos, xa que segundo adianta Garrote, “neste momento, o primeiro tramo do Paseo Matutino é a zona na que se pode actuar pero a nosa intención é facer unha mellora en toda a rúa en canto sexa posible unha vez aprobado o Plan de ordenación”.
A superficie de actuación será duns 1.150 metros cadrados, dos que 785 metros cadrados serán beirarrúa e 370 calzada para vehículos. O primeiro tramo do Paseo Matutino será unha plataforma única de convivencia con prioridade para os peóns e non haberá desniveis entre a beirarrúa e a calzada, a pedra de granito gris quedará para a beirarúa marcando a calzada con asfalto de cor. As terrazas da hostalería irán pegadas aos establecementos e disporase dunha fila de árbores de porte alto e folla caduca.
Na actualidade a beirarrúa esquerda (vista dende o Concello) é de 1,50 m e pasará a 6 metros, nela irá a fila de arborado. A beirarúa da dereita terá 4,45 m. Nas dúas beirarrúas estará delimitando o espazo máximo que poden ocupar as terrazas quedando despexados os portais de acceso ás vivendas quedarán despexados e a folla caduca evitará que se produza sombra nas vivendas durante a tempada invernal.

Saneamento
Outra das actuacións é a instalación dun colector de augas fluviais para separar pluviais de fecais xa que neste tramo non hai colector independente. O colector terá capacidade para 18.000 metros cadrados para recoller as augas de chuvia de todo o entorno.
O novo alumeado seguirá os criterios de eficiencia enerxética, con luminarias tipo LED e tamén se colocarán bancos de granito, papeleiras e bolardos
Na reunión estiveron tamén a arquitecta municipal e o arquitecto responsable do proxecto.
“A nosa intención é que a inversión contemplada naquel primeiro proxecto de reforma do Paseo Matutino siga a ser destinada á mellora desa zona. O proxecto anterior, que neste momento non se pode executar, non contemplaba o primeiro tramo e só preveía a actuación en parte das beirarrúas, este é máis completo e recolle toda a plataforma, alumeado, mobiliario e saneamento”, engade Garrote.
O goberno de Ponteareas convoca a tódolos veciños, comerciantes e propietarios do Paseo Matutino a asistir a vindeira reunión que terá lugar o sábado 16 ás 10 horas.