Numerosos veciños participaron este xoves na visita guiada ao Cemiterio Municipal de Ponteareas, programada pola Concellería de Cultura, que dirixe Andrés Sampedro Fernández, coa finalidade de dar a coñecer o patrimonio artístico que constitúe este conxunto funerario.
A visita correu a cargo do etnógrafo e estudoso Estanislao Fernández de la Cigoña Núñez, un dos máis importantes investigadores dentro do eido da natureza ou da etnografía, entre outros. Da man deste gran coñecedor, púidose coñecer a arquitectura funeraria e igualmente os traballos dos marmoristas de Ponteareas, autores de sorprendentes mausoleos, vistosos panteóns e artísticas lápidas. Achegáronse tamén os visitantes a aqueles persoeiros ilustres de Ponteareas que teñen neste cemiterio a súa última morada.
Contou esta actividade coa asistencia do edil de Cultura, Andrés Sampedro, quen manifestou que con este tipo de visitas preténdese dar a coñecer á cidadanía parte do patrimonio cultural e artístico da Vila do Tea, así como agradeceu igualmente poder contar con Estanislao Fernández, un dos persoeiros que máis investigaron neste eido e que deu lugar á publicación do libro “Os marmoristas-construtores de tumbas dos séculos XIX e XX nos camposantos de Ponteareas”. Xunto a estas actividades programárose durante este verán tamén outras visitas para coñecer o patrimonio natural e cultural, como foi o percorrido polo casco urbano de Ponteareas, que contou tamén con moitos asistentes que querían profundizar no coñecemento da vila.