A concellería de Ensino do concello de Ponteareas, dirixida por Cristina Fernández, adianta que a día de hoxe xa hai vinteseis preinscritos no bacharelato de Artes que se oferta por vez primeira na comarca.
Aínda pendentes de pechar a listaxe co comezo do novo curso as cifras xa cubren a meirande parte das prazas ofertadas e demostran o interés real que existía neste tipo de estudos dende hai moito tempo.
A dirección do centro amosa a súa satisfacción pola resposta da comunidade educativa que respalda con este número de preinscrición inicial a necesidade que existía. “Imos por todos os nosos medios para que satisfacer as expectativas do alumnado”.
Ademais, adiantan que o bacharelato de artes estará enfocado as materias de audiovisuais xa que noutros centros da área metropolitana xa se ofrece a de música ou a de debuxo artístico. “O departamento de artes plásticas terá un maior volume de traballo e incremento de horas lectivas pero o profesorado está moi ilusionado e motivado por este novo reto”.
Pola súa parte a concelleira Cristina Fernández desexa a toda a comunidade educativa que esta nova experiencia sexa exitosa e recolla bos froitos, “logo de moitos anos demandando esta ensinanza e despois de vencer as reticencias da administración autonómica estou segura de que a comunidade educativa saberá aproveitar ao máximo esta oportunidade”.