O obradoiro é gratuíto e dará comezo o vindeiro mércores 16 de setembro ás 18:00 horas na sala de usos múltiples da Biblioteca Municipal
A Oficina Municipal de Información Xuvenil de Ponteareas, dependente da concellería de Mocidade que xestiona Verónica Carrera, desenvolverá ao longo de varios días do mes de setembro un obradoiro de relaxación e control do estrés denominado “Pensando e sentindo en positivo”.
O taller terá lugar na sala de usos múltiples da Biblioteca Municipal, situada na rúa A Perillana número 9, os vindeiros días 16, 21, 23 e 28 de setembro en horario de 18:00 a 20:00 horas.
O obradoiro está dirixido a calquera persoa que desexe aprender a controlar e xestionar mellor as súas propias emocións, de xeito que algúns sentimentos como o medo ou estrés, que poden aparecer en varios momentos ao longo da vida de moitas persoas, non supoñan unha limitación no desenvolvemento da mesma.
Está cientificamente comprobado que a relaxación mellora o rego sanguíneo, distende os músculos, harmoniza a respiración e proporciona unha sensación de benestar, trasladando esa sensación física ao estado psicolóxico das persoas.
Este curso é totalmente gratuíto, tal e como habitualmente acontece coas iniciativas que se desenvolven dende a OMIX de Ponteareas. As persoas que desexen participar nesta actividade deberán inscribirse na Oficina Municipal de Información Xuvenil do Concello de Ponteareas, a través do enderezo electrónico: omix@ponteareas.es, ou chamando ao número de teléfono 672 105 468.