Será o 11 de outubro ás 18 horas no auditorio Reveriano Soutullo
Recomendado para nenos e nenas a partir de 3 anos, o programa APEGO volve ao auditorio municipal este venres 11 de outubro ás 18 horas co concerto de Pablo Díaz, “Coas miñas mans”.
Pablo Díaz leva xa 4 traballos discográficos dedicados ao público infantil. Durante os case dez de carreira leva percorridas moitas escolas infantís, de primaria, ademais dos concertos habituais por diferentes localidades galegas.
Nesta andaina percatouse da importancia que para as nenas e nenos ten toda a xestualización manual e facial, e por este motivo, partindo das mans como estratexia comunicativa, xorde este traballo.
Empregamos as mans para comunicarnos, para escribir, debuxar, pintar, contar,sentir, etc. É a partir dos 3 anos cando dun xeito máis ou menos consciente, as cativas e cativos empezan a adquirir este tipo de destrezas e habilidades.
De aí cancións como: “As mans”, “Os números”, “As vogais”, “Figuriñas de papel”, “As cores”, “Os 5 sentidos”…
Ademais destes temas, trátanse tamén outros máis lúdicos para eles como a primavera, os xogos, as mascotas.
A concellería de Lingua que dirixe Fernando Groba convida a todas as familias a desfrutar deste concerto de 55 minutos aproximadamente que axudarán a cantar e a xesticular.
Apego é un programa colectivo dirixido a fomentar e a facilitar a transmisión do galego como lingua inicial e a socialización dos nenos e das nenas entre 0 e 6 anos no noso idioma, para o que se desenvolven materiais, facilítanse e difúndense recursos, deséñanse e prográmanse actividades para nais e pais e para nenos e nenas, etc.