A autora presentará a súa obra este venres 8 ás 20.30 h na sala multiúsos do auditorio municipal
Estará compañada polo concelleiro Fernando Groba, o escritor Fernando Juan Morado, Cone, e o profesor e escritor Xulio Pardo de Neyra
Foi un traballo “desexado, rido, chorado, pero sobre todo feito con alma, corazón e ilusión”. Así define Sonia Melón o seu libro ‘Dende a Miña Xanela’, un verdadeiro canto á poesía que a autora presentará este venres 8 de xullo en Ponteareas.
A cita será ás 20.30 horas na sala multiúsos do auditorio municipal, na que esta ponteareá de adopción dará a coñecer ao público a súa ópera prima arroupada polo escritor Fernando Juan Morado, Cone, polo profesor e escritor Xulio Pardo de Neyra e polo concelleiro de Cultura, Fernando Groba. “É un orgullo descubrir o gran potencial literario de Ponteareas e da comarca, con novas autoras e autores cun gran potencial e moita ilusión que están a realizar un traballo único”, salienta o edil, que convida a toda a veciñanza a acompañar á autora na presentación.
Sonia Melón, nada en Mondariz, viven dende hai moitos anos en Ponteareas. A pesar de que os seus camiños profesionais levárona lonxe da literatura, preséntase agora ante o público cunha obra coa que consegue facer realidade un soño e co que comeza a xermolar un mundo de ilusións. A entrada será de balde ata completar aforo.