Solidariedade e deporte durante o mes de decembro en Ponteareas

A Escola de Billar do Centro Artístico Sportivo e o Club de Xadrez Ramiro Sabell, en colaboración coa concellería de Deportes, organizan un conxunto de actividades que combinarán a práctica deportiva coa recollida de alimentos para aquelas persoas que máis o precisen

act-dep-decembro-1Un torneo de billar os días 26 e 27 de decembro e un un xadrez vivente na Praza Maior a partir das 17:00 horas do xoves 17 de decembro preséntanse como dous dos principais atractivos dun conxunto de actividades que provocarán que o presente mes decembro sexa especialmente deportivo e tamén especialmente solidario en Ponteareas.

Aos dous torneos previamente mencionados hai que sumar outras actividades como unha andaina histórica polo concello o vindeiro sábado 5 de decembro a partir das 17:00 horas; un campionato de tute o luns 7 de decembro a partir das 22:00 horas; unha actividade de zumba o sábado 12 de decembro ás 19:00 horas;  e un torneo de xadrez o 19 de decembro a partir das 16:30 horas. Agás a andaina histórica e o xadrfez vivente anteriormente mencionado, todos os eventos se desenvolverán no Centro Artístico Sportivo.decembro-solidario-deportivo

O concelleiro de Deportes, Benito Márquez, mostrouse “moi satisfeito de que este tipo de iniciativas nazan dos propios colectivos da vila”. O edil sinalou “que ante estas propostas o Concello non pode máis que ofrecer a súa colaboración en todo aquilo que sexa preciso, pois ademais de fomentar a práctica deportiva estamos axudando a recadar alimentos para as persoas que así o precisen nestas datas tan sinaladas”. Márquez alegrouse, asemade, de que “modalidades como o xadrez ou o billar sigan tendo presenza na programación deportiva do municipio”.

A asociación Ponte Solidario encargarase da recollida de alimentos durante a celebración do xadrez vivente, mentres que para o resto de eventos será o Centro de Reparto de Alimentos o encargado de realizar este labor.