Ponteareas acollerá un ano máis nas pistas da Freixa o Open Tenis Vila do Corpus organizado polo Club Tenis Ponteareas, coa colaboración do Concellería de Deportes.
Os interesados en participar no torneo, que deben estar federados, poderán anotarse ata ás 21.00 horas do 21 de xuño por unha cuota de 8 euros. Para poder participar haberá que facilitar ben ao teléfono 607161182, ben ao correo electrónico clubtenisponteareas@hotmail.com nome, apelidos, número de licencia, club e teléfono de contacto. Todas as inscricións serán confirmadas polo club organizador. O torneo terá categorías masculina de alevín, cadete, senior e veteranos maiores de 35, e feminina de alevín, cadete e senior.
O Concelleiro de Deportes, Benito Márquez, anima “a toda a veciñanza a achegarse ata as pistas da Freixa para disfrutar dun dos actos con máis tradición de Ponteareas e que xa goza de gran renome máis alá do noso termo municipal”.