O alcalde do Concello de Ponteareas, Salvador González Solla, xunto coa responsable da Concellería de Economía e Facenda, Belén Villar González, e o edil de Cultura, Andrés Sampedro Fernández, reuníronse _cos representantes das casas culturais do Concello de Ponteareas coa finalidade de informalos persoalmente de todos aqueles aspectos relacionados coas “Bases de subvencións de apoia á cultura, destinadas aos centros e casas culturais do Concello de Ponteareas”.
Salvador González Solla detallou nesta xuntanza mantida coas asociacións todos os aspectos recollidos nas devanditas bases de subvencións, así como aclarou todas as dúbidas e cuestións de interese sobre estas axudas. Así mesmo, o edil delegado de Cultura, Andrés Sampedro, manifestoulles o apoio, colaboración e asesoramento da súa concellería en todo o relacionado con esta liña de axudas.
A través destas axudas, o Concello de Ponteareas invistirá 40.000 euros en subvencións de apoio á Cultura destinadas aos centros e casas culturais do municipio, cuxa finalidade é colaborar cos gastos de funcionamento e mantemento dos mencionados centros ou casas, así como fomentar, impulsar e apoiar as actividades culturais e musicais que estes desenvolven dentro do seu ámbito de actuación.
Poderán solicitar estas axudas as asociacións sen ánimo de lucro e legalmente constituídas dos centros e casas culturais do municipio de Ponteareas. Os beneficiarios destas subvencións contarán cunha partida económica inicial fixa, e igual para todos, por importe de 400 euros para gastos xerais como limpeza, enerxía eléctrica, ou calquera outro gasto, e cunha partida económica variable en función dunha serie de parámetros, como pode ser o número de socios ou o gasto en actividades culturais que desenvolven, entre outros.
Os interesados terán de prazo ata o día 2 de novembro de 2014 para solicitar a subvención a través do modelo normalizado que se lles facilitará no Departamento de Cultura do Concello de Ponteareas, ou na páxina web do concello, xunto coa documentación precisa, e presentaranse no Rexistro Xeral de Entrada do Concello de Ponteareas.
Así mesmo, cómpre destacar que o Concello de Ponteareas, desde hai xa dous anos, ten posto en marcha outras liñas de axudas que abarcan un plan de accións formativas nos centros e casas culturais, así como o Plan Cultural, ambos cunha dotación orzamentaria que supera os 22.000 euros e que, xunto con estas novas subvencións de apoio á Cultura, veñen supoñer un total de 62.000 euros.