Unha vintena de mozos e mozas da vila representaron á vila por primeira vez nesta competición transfronteiriza disputada en Vila Nova de Gaia
Grandes resultados para Ponteareas no III Torneo Eixo Atlántico de Taekwondo celebrado esta fin de semana no Centro de Alto Rendemento de Vila Nova de Gaia.
Vinte mozos e mozas ponteareás estreábanse nesta competición transfronteiriza da que regresaron con 13 medallas, catro ouros, unha prata e oito bronces nas dez categorías de peso disputadas nas modalidades de cadete e júnior. Destacan os bos resultados obtidos en cadete feminino, no que as cinco representantes da vila obtiveron metal, quedando segundas clasificadas por equipos na categoría.
O concelleiro de Deportes, Miguel Bouzó, quere felicitar a todas e todos os deportistas participantes polo bo traballo e o alto nivel exhibido durante todo o campionato “e deixar o nome de Ponteareas en tan bo lugar”, así como pola boa convivencia co resto de deportistas galegos e portugueses participantes. O edil animounos a continuar por este camiño, “a seguir adestrando e gozando do deporte por riba de calquera competición”.