O concello non dispuña de inventario malia ser unha obriga legal
O último acordo plenario para levar a cabo un inventario municipal data do ano 1958
O alcalde de Ponteareas, Xosé Represas, vén de comunicar que “o novo goberno municipal iniciou os traballos de realización do inventario municipal de bens e propiedades, nos que se inclúen recursos que pertencen ao ámbito municipal como por exemplo edificios públicos, instalacións polideportivas, centros sanitarios, centros de ensino, vías públicas, parques e xardíns, elementos de iluminación pública, flotas de vehículos, sinalizacións, mobiliario e dotacións urbanas, sistema de auga e rede de sumidoiros, farois ou colectores.
Represas salientou que “aínda que resulte sorprendente, o certo é que este concello non dispón de inventario de bens, algo incríbel no século XXI”. A Lei de Patrimonio das Administracións Públicas obriga a todos os concellos a dipoñer dun inventario de activos municipais, polo que “durante moitos anos e por desidia de anteriores gobernos locais en mans do Partido Popular, o Concello de Ponteareas incumpriu a normativa neste eido”, apuntou o rexedor. De feito, “o último acordo plenario para desenvolver un inventario deste tipo en Ponteareas data do 31 de decembro de 1958, hai case 60 anos”.
O alcalde suliñou a importancia dos traballos, que deron comezo xa en agosto, e que e unha vez concluídos serán levados a pleno para a súa aprobación. “Con esta actuación avanzamos na modernización da administración municipal e contaremos cun instrumento básico para saber que patrimonio ten o Concello de Ponteareas e poder defendelo, protexelo e salvagardalo”.
A actuación permitirá o inventariado de todos os activos municipais, desde edificios e instalacións públicas até o alumeado ou as vías os e camiños públicos. Toda a información estará aloxada nunha plataforma tecnolóxica onde os bens poderán ser xeolocalizados sobre o terreo.
Ademais, Represas salientou que esta actuación é posíbel grazas a colaboración entre o Concello e a Deputación Provincial. “O cambio de goberno na Deputación e no Concello, e a espléndida relación entre ambas as dúas institucións, estase traducindo en resultados moi positivos para os ponteareáns”.