A concellería de Cultura e Lingua, que dirixe Fernando Groba, adianta que nesta décimo terceira edición da Feira dos Remedios contarase con colaboracións especiais como a da Asociación de Criadores do Cabalo de Pura Raza Galega (Puraga) e a do Club Can de Palleiro.
Cun renovado enfoque, a Feira Tradicional dos Remedios de Ponteareas quere poñer en valor as razas autóctonas desde un punto de vista funcional. Con tal propósito, contactou coas diferentes asociacións de criadores de razas autóctonas de Galiza e dúas delas amosarán os seus animais no parque da Feira Vella a partir das once da mañá e tamén en horario de tarde co obxectivo de dar a coñecer as nosas razas e destacar a súa valía e características que os diferencian do resto das razas.
DEGUSTACIÓN DE CARNE DE POLDRO
A Asociación de Criadores do Cabalo de Pura Raza Galega (Puraga) patrocina, por unha banda, un posto de degustación gratuíta de hamburguesas e chourizos elaborados con carne ecolóxica de poldro. En segundo lugar, realizará unha descrición morfolóxica dun exemplar de Pura Raza Galega para coñecer, da man dunha das técnicas da asociación, cales son as características que ten que presentar un bo exemplar desta raza equina. E, en terceiro termo, realizará unha exhibición-demostración do ancestral (Plinio xa falaba del na súa literatura ao falar dos Callaici) e tradicional (foron os animais preferidos para viaxar até a chegada dos vehículos de tracción mecánica) paso de andadura.
Pola súa banda, o Club Can de Palleiro brindaralles aos ponteareáns e ás ponteareás un Monográfico completo sobre este cánido (un concurso morfolóxico) que terá unha duración de dúas horas. Estes animais, para alén de seren fantásticos compañeiros na vida diaria de calquera persoa, son formidábeis tanto como cans pastores para axudar nas tarefas gandeiras con gando menor (ovellas ou cabras) e maior (vacas ou cabalos) como cans guía para persoas invidentes ou con necesidades especiais.
A Concellería de Cultura agradece a colaboración da Federación de razas autóctonas de Galicia, BOAGA, e a Asociación de Criadores de Gando Celta, ASOPORCEL.
Entre as razas que atoparemos na Feira Vella estarán tamén a vaca rubia galega, frieiresa, caldelá e cachena, a cabra galega, a ovella galega e a galiña de Mos.