Este ano suma unha nova convocatoria de 70.000 euros, despois de destinar medio millón de euros para estas obras nos últimos 4 anos.
O goberno local de Ponteareas ven de anticipar a todas as asociacións de traídas veciñais de augas unha nova convocatoria de axudas, por importe de 70.000€, que sairá publicada no Boletín Oficial da Provincia na vindeira semana.
Estas axudas, que se financian con fondos propios do Concello, é posible realizala agora grazas a superar a situación económica de bancarrota anterior a 2018. O prazo para a presentación das solicitude é de 20 días naturais a partir da publicación no BOP. Neste momento, todas as traídas xa dispoñen de toda a información para adiantar a documentación que deben presentar á convocatoria.
“Durante moitos anos, as comunidades de augas foron resolvendo este problema xestionando o seu propio subministro e, en moitos casos, a título individual cada fogar construíu o seu propio pozo. Pero coa seca, sumado ás consecuencias dos incendios, moitos pozos esgotáronse e as redes de abastecemento das traídas de augas resultan xa insuficientes. Esta cuestión, na que xa levamos traballando un tempo, é de vital importancia ao tratarse non só dun subministro de primeira necesidade senón tamén dunha ferramenta de defensa das vivendas contra o lume”, explican dende o goberno do BNG e PSOE.
A convocatoria de 2021 primará ás peticións das traídas que non recibiron axuda noutros anos. Ademais, a concesión destas axudas supón unha inxección de fondos que promoven o emprego próximo, porque permiten que as comunidades de augas contraten obras que, moitas veces, son realizadas por pequenas empresas locais.
No balance desta pioneira convocatoria de axudas, o goberno ponteareán destacou “a excelente acollida que tivo esta iniciativa nos últimos anos, que permitiu realizar investimentos por importe superior a 500.000 euros na maioría das parroquias con traídas veciñais. Entre as obras realizadas figuran melloras nos sistemas de captación de auga, sistemas de almacenamento e potabilización (depósitos, filtración, decantación, etc.) e melloras nas redes de distribución de augas.