Os rexedores dos concellos de ámbalas dúas comarcas acordaron, nun recente encontro, enviar as súas respectivas peticións
Xosé Represas, alcalde de Ponteareas, vén de facer efectivo o comunicado no que solicita a xuntanza co Vicepresidente da Xunta de Galicia, Alfonso Rueda
O alcalde do Concello de Ponte
areas, Xosé Represas, vén de facer efectivo o comunicado no que se demanda un encontro co Vicepresidente da Xunta de Galicia, Alfonso Rueda, para procurarlle solucións ás carencias coas que conta agora mesmo o sistema de transporte público cara ao novo hospital “Álvaro Cunqueiro” nas comarcas do Condado e A Paradanta.
O envío deste comunicado responde ao acordo chegado entre todos os rexedores municipais dos concellos de ámbalas dúas comarcas nun encontro mantido en datas recentes. Nesa reunión, os diferentes responsables cadraron na necesidade de desenvolver un traballo conxunto neste aspecto e comprometéronse a enviar os comunicados oficiais dende cada un dos concellos afectados.
O obxectivo desta petición por parte de Xosé Represas e do resto de alcaldes non é outro que o de demandar á Xunta de Galicia un servizo de transporte público de calidade para que todos os veciños e as veciñas das comarcas do Condado e A Paradanta poidan desprazarse até o novo hospital de Vigo “Álvaro Cunqueiro”.
Todos os representantes defenderán a necesidade de que este servizo sexa áxil, operativo e directo, ademais de ter unha correspondencia en termos de tempo e custo económico coas cifras que até agora eran necesarias para desprazarse até o hospital Meixoeiro.
A xuntanza tamén servirá para presentar como prioridade a gratuidade do aparcamento deste centro hospitalario, pois as tarifas que xa se están aplicando supoñen un enorme gasto para moitas persoas que precisan permanecer horas no complexo para tratar as súas doenzas.
Os encontros mantidos até agora entre os diferentes rexedores poñen de manifesto a coincidencia de todas as partes na falta de previsión por parte dunha Xunta de Galicia que, asemade, é a administración que debe aportar solucións, pois goza das competencias de sanidade e de transporte. Dita carencia de planificación prexudica ao transporte público e impide ofrecer un servizo que xa se converteu nunha auténtica demanda social por parte da veciñanza de todos estes concellos.