Obradoiro de marionetas de papel na Axencia de Lectura de Xinzo

Foto cartel viravoltasA Axencia de Lectura de Xinzo, no Concello de Ponteareas, organiza un obradoiro de monicreques de papel o xoves 23 de abril a partir das 6 da tarde. O obradoiro enmárcase dentro do conxunto de actividades previstas pola Concellería de Cultura, xestionada por Andrés Sampedro, para conmemorar o Día Internacional do Libro.

A compañía Viravolta Títeres será a encargada de ensinar aos nenos de entre 6 e 12 anos os principios básicos da papiroflexia que lles permitan elaborar as marionetas con cartolinas de diferentes cores. A actividade é de balde e dende animan a todos os nenos e nenas a se achegar para gozar da aprendizaxe.

Trátase dunha iniciativa enmarcada no programa “Ler conta moito”, promovido pola Consellería de Cultura. Ademais deste obradoiro, o xoves 23 pola tarde tamén se organiza unha lectura aberta para nenos do Quixote Infantil na Biblioteca Municipal de Ponteareas.