O ciclo de concertos pechará o vindeiro venres, día 12
O Festival Groba, que se está a celebrar na vila de Ponteareas dende o pasado día 5, vén de superar o seu ecuador a pasada noite coa estrea dun ciclo para orquestra de corda escrito este mesmo ano por Rogelio Groba e inspirado no discurso que Castelao pronunciou en 1948 en Buenos Aires “Alba de Gloria”. Foi o cuarto dun total de oito concertos programados na presente edición.
O público foi quen de superar as altas temperaturas de días pasados para asistir a unha actividade que se está a consolidar dende os seus inicios, en 2013, como unha das referencias máis interesantes do verán musical galego, grazas, en boa medida, á presencia de intérpretes de contrastada calidade a nivel mundial. Sirva como exemplo a participación este ano de Guy Braunstein, que foi concertino da Orquestra Filharmónica de Berlín; Emmanuele Baldini, solista da Orquestra Sinfónica do Estado de Sao Paulo; ou nomes xa coñecidos pola súa participación en anteriores edicións do festival, como Lea Hennino, Kyoungmin Park, Clara Jumi Kang ou Kasia Wiezcorek, entre outros.
Xunto a estes intérpretes, o apoio incondicional a músicos galegos, que este ano estarán representados polo frautista ferrolán Bernabé Simes e a chelista Alba Reirís, xunto á propia Orquestra de Cámara Galega (OCGa) que, un ano máis, vén actuando de “orquestra residente” do festival.
Dende os seus inicios, esta cita musical tivo como sinal de identidade unha estrutura que, sendo habitual noutras latitudes europeas, se converteu en novidosa na nosa Comunidade: amais dos concertos, que teñen lugar todos os días a partir das 21:00 horas no Auditorio Municipal, os solistas convidados realizan unha serie de cursos de formación, auténticas clases maxistrais, ás que poden asistir os alumnos interesados. Este ano, Zvi Plesser, reputado pedagogo e solista, impartiu clases de violonchelo, e Emmanuele Baldini ofreceu un curso especial para solistas de violín. Algúns dos seus alumnos participarán no concerto de clausura actuando xunto á OCG. Pero un dos cursos máis novidosos é o de “Biomecánica e prevención de lesións para violinistas”, que tivo lugar a pasada fin de semana por parte da fisioterapeuta Nerea Carrera.
Nos días que restan de festival, que rematará o vindeiro venres, día 12, aínda quedan pendentes a estrea de dous dos catro concertos que integran o ciclo “A roda do ano”, de Rogelio Groba (os titulados Primavera” e “Verán”), e a interpretación de obras de Clara e Robert Schumann, Mendelssohn, Bach, Beethoven, Brahms e Vivaldi.