Pablo Cabana subíu ao podium coas súas compañeiras e compañeiros a través de videoconferencia para compartir o ouro acadado con elas e eles
A concellaría de Deportes, que dirixe en funcións Miguel Bouzó, quere dar os parabéns en nome de todo o goberno local ao Club Natación Ponteareas, que se alzou esta semana co título de campión galego na clasificación conxunta. Tamén felicita á nadadora do club Sofía Carballo, que acadou a medalla de ouro e o título de campioa galega en 50, 100 e 200 braza, e a Carla Faro, que o logrou nos 100 estilos. Os parabéns tamén son para o nadador Pablo Cabana, que se fixo co título de campión galego e medalla de ouro nos 200 Bolboreta. Ademais, o club ponteareán tamén acadou o subcampionato na categoría feminina.
O director técnico do club, Andrés Carrera, amosouse moi satisfeito por este resultado sobre todo pola actitude positiva de todos os integrantes do equipo. Durante o tres días, segundo relata Carreira os nadadores e nadadoras brillaron loitando para acadar logros colectivos e individuais, “un feito que me fai estar moi satisfeito porque os nadadores e nadadoras viñeron a Pontevedra a bater as súas mellores marcas persoais nunha das probas máis importantes da tempada, isto demostra que teñen talento e mentalidade gañadora”.
Andrés Carrera engade que é de destacar, por exemplo, que por primeira vez un equipo de substitución masculina (4×200 libres) subise ao podio, cun bronce. Tamén por primeira vez o equipo feminino conseguía que todas as súas substitucións (4×50 libres, 4×100 libres, 4×200 libres, 4×50 estilos, e 4×100 estilos) subisen ao podio situándose entre o tres primeiros clubs clasificados.
Miguel Bouzó fai extensiva a felicitación ao corpo técnico do club, así como a súa xunta directiva e familias que o integran, salientando “o importante esforzo que realizan ao longo de todo o ano e que se viu aumentado durante os últimos meses para poder manter os adestramentos e a participación en competicións coas instalacións municipais pechadas pola incidencia da pandemia na localidade”.
O concelleiro afirmou que “este traballo non se reflicte só nos resultados acadados polos seus nadadores e nadadoras, que colocan o nome de Ponteareas como un referente no ámbito deportivo, senón tamén no éxito das probas que o club vén organizando na piscina do complexo deportivo municipal Álvaro Pino”.