A Concellería de Vías e Obras do Concello de Ponteareas, despois de mellorar os accesos de entrada da estrada N-120 ata o Centro Cultural de Arcos, procedeu á apertura dun novo vial de unión entre a subida do cemiterio e igrexa de Arcos coa estrada de subida á Picaraña.
Previamente, acometéronse traballos de construción dun muro de contención de mampostería e preparación do terreo, nivelándoo e acondicionándoo, con achega de pedra para o posterior asfaltado.
Este novo vial posibilitará o acceso directo á 1ª. planta do Centro Cultural de Arcos, así como permitirá aos vehículos acceder dun lado a outro do recinto sen ter que desprazarse ata a estrada N-120, o que significará unha grande comodidade para os veciños que se achegan ata o centro cultural.
A través destas obras continúase, segundo o Goberno local, coa mellora das vías de circulación municipal, tanto do casco urbano como do rural, buscando as mellores condicións para a circulación viaria así, como neste caso, facilitar o acceso aos centros de reunión dos veciños.