O Concello de Ponteareas informa que a Policía Local dispón de imaxes do vertido de aceite na praza de Bugallal

Causan deliberadamente importantes danos nas obras da Praza de Bugallal

Foron trasladadas á Garda Civil para que os seus servizos científicos as analicen e determinen a identidade do responsábel dos danos

 

O Concello de Ponteares informa de que a Policía Local dispón de imaxes do momento no que se producíu o vertido deliberado de aceite sobre o pavimento da Praza de Bugallal o pasado mes de setembro. Nas imaxes obtidas obsérvase a un individuo, varón, camiñando polo espazo e portando un recipiente cuxo contido líquido vai vertendo ao longo do seu percorrido dende a rúa Morales Hidalgo ata a rúa Senén Canido. 

 

Segundo informan no Concello as imaxes tamén permiten observar o rostro do autor dos danos así como outras características físicas. As imaxes foron facilitadas pola Policía Local á Garda Civil para que os seus servizos científicos poidan mellorar a súa calidade e definición permitindo así a correcta identificación do autor do vertido.

 

O Concello agradece a colaboración cidadá e da Garda Civil imprescindíbel para identificar ao autor do vertido e para poder esixir as correspondentes responsabilidades.