O Centro de Reparto de Alimentos de Ponteareas, dependente da Concellería de Servizos Sociais, atendeu durante o 2014 a preto de 500 veciños empadroados no municipio que reciben cada venres produtos de primeira necesidade. Xunto con esta axuda en alimentos, o Centro de Reparto de Alimentos conta cun roupeiro, abastecido de roupa e enseres doados, sendo entregados segundo demanda.
Ademais, destas axudas de alimentos, o Concello de Ponteareas puxo en marcha no 2014, un novo servizo “O menú escolar”, dirixido a menores en idade escolar que non foron incluídos por diferentes motivos no servizo do comedor escolar nos propios centros, dependente da Consellería de Educación. A través deste servizo municipal, repartíronse un total de 3781 menús entre as familias beneficiarias, cun custo de máis de 15.000 euros, sendo atendidas todas as solicitudes presentadas para poder beneficiarse deste servizo, posto que desde o Goberno Local considérase prioritario atender este tipo de necesidades xa que a falta de alimentos nunha familia non admite espera. Estes menús escolares son subministrados por unha empresa de cátering ponteareá, que elabora diariamente uns menús individualizados, que os beneficiarios levan ás súas propias casas cada día, disfrutando do menú no seu propio ambiente familiar. Xunto a este servizo novo, o Concello de Ponteareas, procedeu a incrementar a partida orzamentaria das axudas escolares, destinadas a sufragar os gastos do comedor escolar, en determinados supostos.
O Goberno local quere agradecer a colaboración e implicación de todas aquelas persoas e empresas que durante todo o ano colaboran coa achega de alimentos, así como de todos os voluntarios que xenerosamente se prestan á recollida dos produtos nas diferentes campañas e festivais celebrados coa finalidade de recadar alimentos e produtos básicos para o Centro de Reparto de Alimentos de Ponteareas.