Enmarcadas dentro do proxecto “O patio que queremos” deseñado polo alumnado do CEIP Santiago de Oliviera, as obras da patinaxe teñen un custe total de 25.000€ que se financiarán con fondos propios da concellería de Ensino que dirixe en funcións Cristina Fernández.
Para facer realidade esta demanda da comunidade educativa do centro, a concellería tivo que acometer obras previas de acondicionamento do terreo para agora, nestes días, proceder á pavimentación e colocación de todos os elementos que recolle o proxecto.
A pista de patinaxe ten 350 metros cadrados rematados en formigón cunha varanda de seguridade en todo o seu perímetro. Para fomentar o xogo un túnel serpenteará por un dos laterais da pista cuberto por plantas trepadoras que tupirán os arcos de aceiro e ofrecerán unha zona de sombra.
As obras complétanse coa realización dunha zona de acceso con peldaños e outra en rampa. Tamén se canalizarán as augas e se colocarán pasamáns.
A partir do mes de setembro, unha vez pasada a tempada de altas temperaturas, a concellería procederá a axardinar a contorna da pista de patinaxe e os arcos do túnel de sombra.
O proxecto “O patio que queremos” foi realizado polo alumnado do centro escolar co apoio do seu profesorado e dun equipo de arquitectos financiados polo concello. Un proxecto no que tamén se propuñan un rocódromo, un merendeiro con bancos e mesas cubertos para estar á sombra e unha zona de baile baixo un porche con espellos, grafittis e barras para estiramentos que a concellería xa executou.
“O patio que queremos” tamén contempla gradas, cabanas para a lectura no exterior e un escenario ao aire libre que se irán executando nos vindeiros cursos.
Este traballo do alumnado de sexto de primaria do ano 2016/2017 e sexto de educación infantil foi seleccionado pola I Bienal Internacional de Educación en Arquitectura (Ludantia) para a exposición que tivo lugar en Pontevedra en 2018.
Dentro da liña de actuación da Concellería de Ensino, está a de ofertar aos Centros Educativos programas e proxectos que conten coa participación infantil e xuvenil, seguindo a experiencia adquirida a través da Rede das Cidades das Nenas e dos Nenos inspirada por Francesco Tonucci, facendo de Ponteareas unha cidade da Infancia.
A concelleira en funcións afirma que “é unha satisfacción apoiar e desenvolver proxectos nos que os protagonistas e creadores son o propio alumnado e a comunidade educativa facendo así que sexan parte activa e responsable do futuro de Ponteareas”.