A concellería de Ensino que dirixe Cristina Fernández clausura o Campus Tea no que nesta tempada estival participaron en quendas de quince días máis de 250 nenas e nenos de idades comprendidas entre os tres e os doce anos de idade.
O Campus Tea facilita a conciliación laboral e familiar e supón un apoio para as familias e unha aprendizaxe divertida para os máis pequenos e pequenas dos nosos fogares.
Con actividades lúdicas e didácticas o alumnado do Campus Tea tivo a oportunidade de pasar o verán viaxando polo tempo dende a idade antiga ata a contemporánea. En cada quenda o alumnado xogou e aprendeu sempre baixo a temática da historia do tempo no que lles tocou desfrutar de xogos cooperativos, actividades deportivas… pero ademais tamén participaron do lecer ao aire libre coñecendo o castro de Troña aqueles e aquelas que participaron na quincena da idade antiga ou o castelo do Sobroso os que viviron a idade media ou os parques e monumentos da vila para os que desfrutaron deste verán na idade contemporánea.
Baixo a atenta ollada dos monitores de tempo libre, educadoras infantis e do director de lecer e tempo libre, os pequenos e pequenas coñeceron Ponteareas e socializáronse nun horario de mañá de nove a dúas da tarde que permite ás nais e pais ter un apoio en tempada vacacional.
Para a concelleira Cristina Fernández é fundamental facilitar todas as ferramentas e apoios precisos para que as familias poidan seguir traballando e ter, á vez, actividades de calidade que contribúan a un crecemento e educación de calidade para os seus fillos e fillas.