O sábado, día 22 de febreiro ás 21:00 h, o auditorio Reveriano Soutullo acolleu a entrega de diplomas dos cursos desenvolvidos ao longo do ano 2013 nos centros culturais e locais sociais de Ponteareas.
Ao longo do ano pasado os diferentes centros culturais e locais sociais de Ponteareas acolleron unha variada oferta formativa, impartíndose os seguintes cursos: informática, cociña e repostería, actividades de animación para nenos, poda, selvicultura e aproveitamentos forestais, manualidades e cestería ecolóxica, arte floral, risoterapia, gerontogimnasia, pilates, talleres de memoria, corte e confección, etc.
Neste acto, entregáronse máis de 500 diplomas que reflicten claramente a importancia que tiveron os preto de 60 cursos que se desenvolveron nos mencionados centros. Esta actividade formativa estivo dirixida a un amplo sector da poboación, abranguendo dende os máis cativos ata os maiores.
O alcalde de Ponteareas e o concelleiro de Cultura, Andrés Sampedro Fernández, agradeceu a colaboración prestada por todos os centros culturais de Ponteareas e a ilusión coa que acolleron estas propostas, que resultaron un éxito, e que anima ao Concello de Ponteareas a seguir con esta oferta formativa, potenciándoa, se cabe, durante o ano 2014.