Forma parte do programa lectivo que os alumnos desta escola desenvolven ao longo do curso para adquirir unha formación profesional como directores de banda de música e estará centrado na obra do compositor Percy Aldridge Grainger
A Academia Europea de Dirección de Banda, con sede en Fornos de Algodres, Portugal, organiza o terceiro encontro do seu curso académico no Auditorio Municipal Reveriano Soutullo, en Ponteareas. O evento terá lugar os vindeiros días 28 e 29 de novembro e foi presentado esta mañá na Casa do Concello en presenza do alcalde, Xosé Represas; da concelleira de Ensino, Cristina Fernández; de Javier Viceiro, director pedagóxico e principal profesor en dirección de orquestra; de Toni Cantal, compositor e profesor nas clases de adestramento auditivo; de Rafael Pérez, director do Conservatorio Municipal de Ponteareas; e de Fran Abal, mestre no Conservatorio Municipal e alumno da Academia.
Trátase dun dos 8 encontros que a Academia, fundada no ano 2014, organiza ao longo do curso e que teñen como principal obxectivo a formación teórica e sobre todo práctica dos 25 alumnos que participan no ano académico 2015/2016. Cada encontro organizado pola entidade versa dunha temática diferente. A reunión que manterán mestres e alumnos en Ponteareas estará centrada na obra do falecido pianista e compositor australiano para orquestras de vento.
O proxecto para desenvolver este encontro “xa lle foi presentado ao Concello no pasado mes de setembro, e dende o primeiro momento nos pareceu unha formidable oportunidade de organizar un evento musical de prestixio na vila”, sinalou a edil de Ensino.
Tanto o sábado 28 de novembro como o domingo 29 haberá aulas abertas para que toda a veciñanza interesada poida asistir aos ensaios dos alumnos da Academia cos alumnos do propio Conservatorio Municipal, nun exercicio no que os aspirantes a directores de bandas de música e orquestras porán en práctica os coñecementos adquiridos. Rafael Pérez, director do Conservatorio, garantiu “que os alumnos estarán á altura dun evento coma este”. A aula aberta do sábado terá lugar dende as 16:30 até as 18:00 horas, mentres que a do domingo será de 12:00 a 13:30 horas.
Colaboración a longo prazo
Tanto Javier Viceiro como Toni Cantal agradeceron “a predisposición do Concello a colaborar dende o inicio da proposta, propiciando que unha academia coma esta e unha vila cunha enorme tradición musical poidan comezar a crear un vínculo produtivo para as dúas partes”.
O alcalde, Xosé Represas, pechou as intervencións incidindo nesa mesma liña e asegurando “que os responsable da Academia de Dirección de Banda non se arrepentirán de ter escollido Ponteareas como lugar para celebrar este encontro”. O propio Represas se comprometeu a “asistir a unha das aulas abertas e a traballar para que esta colaboración poida manterse no futuro”.