O acto terá lugar no Salón de Plenos do Concello o vindeiro venres 10, a partir das 20:30 horas
A escritora e xornalista da Televisión de Galicia e a Radio Galega, María Solar, presentadora na actualidade do magazine informativo A Revista Fin de Semana vai presentar a súa nova novela xuvenil.
A obra ambiéntase no hospicio da cidade da Coruña , en 1803, os nenos sobreviven a duras penas. Nin eles, nin a súa reitora Isabel Zendal, poden imaxinar de que maneira lles cambiará a vida a chegada do doutor Balmis e a súa expedición médica. Só o ilustrado doutor Antonio Posse Roybanes coñece a envergadura do propósito destes homes que pretenden levar a recentemente descuberta vacina da varíola ata o Novo Mundo. Vinte e dous orfos procedentes de Madrid, A Coruña e Santiago conformarán unha cadea humana “brazo a brazo” para levar a vacina aos territorios de ultramar nunha das maiores xestas médicas realizadas na historia da humanidade.
María Solar estará acompañada nesta presentación polo seu editor, Francisco Castro, da editorial Galaxia, e por Manrique Fernández, coordinador do ciclo.