As alumnas do módulo de atención sociosanitaria do Obradoiro Compromiso Social III realizan as súas prácticas na residencia de maiores Santa Ana e no servizo de atención a domicilio aplicando os coñecementos adquiridos ao longo do curso.
Auxiliares e amigas, as alumnas do módulo de sociosanitaria non só colaboran nas tarefas de aseo diario, lavandería ou comedor, son ademais as compañeiras do tempo de lecer animando e motivando aos residentes de Santa Ana aportando a súa ilusión e gañas de facer equipo.
Repartidas en grupos de cinco, as alumnas deste obradoiro financiando pola Xunta de Galicia e cunha duración de nove meses, desempeñan as súas labores nos fogares e outras na residencia. A diario supoñen un apoio para as traballadoras e os traballadores tanto da residencia como da atención á domicilio ao mesmo tempo que completan a súa formación.
A concelleira de Benestar Social, Igualdade e Mocidade, Verónica Carrera, recoñece a labor desenvolta por estas mulleres que nestes meses dan apoio ao traballo desenvolto a diario polo resto das traballadoras e traballadores municipais, dinamizado ademais o día a día dos beneficiarios e beneficiarias do servizo.
O Alcalde de Ponteareas, o nacionalista Xosé Represas, salienta a importancia de completar a formación con clases prácticas na que se aplican os coñecementos e nas que o alumnado aporta a súa pegada persoal. “Este obradoiro cumpre así os seus obxectivos, completan a formación con prácticas e ao mesmo tempo ofrecen un retorno e un aporte á sociedade desempeñando o seu traballo no tempo correspondente ás prácticas”.
As alumnas realizan ademais, actividades de percepción, atención, memoria, recuperación de cantigas populares… e moitas outras tarefas do día a día como o horto co que contarán nos vindeiros días e que terán que coidar os usuarios e usuarias.
As propias alumnas realizan algunhas das ferramentas que son empregadas nas actividades reciclando materiais. Estes obradoiros contribúen a crear traballadores e traballadoras autosuficientes capaces de afrontar os traballos tanto dende a técnica como dende a creatividade atopando a aportación social que deixa cada traballo realizado.