Nos cursos, de balde, a rapazada traballará e experimentará cos kits de creación interactiva Makey
A aula CeMIT de Ponteareas acolle este mes de xullo os obradoiros Steam, derrubando estereotipos, dous cursos dirixidos a mozos e mozas de 8 a 15 anos nos que aprenderán a usar a tecnoloxía a través da creatividade. Nos talleres os rapaces e rapazas participantes traballarán e experimentarán cos kits Makey Makey, uns xogos de creación interactiva que lles permitirá converter practicamente calquera obxecto en paneis táctiles e buscar novos xeitos de interactuar cos ordenadores, potenciando a creatividade, a imaxinación e o deseño.
A Concellaría de Innovación e Desenvolvemento Tecnolóxico, que dirixe Benito Márquez, organizará dous obradoiros en función da idade dos mozos e mozas participantes:
- O xoves 29 de xullo, de 11.00 a 14.00 horas, dirixido á rapazada de 8 a 11 anos.
- O venres 30 de xullo, de 11.00 a 14.00 horas, dirixido á mocidade de 12 a 15 anos.
Os obradoiros serán de balde e celebraranse nas instalacións da aula CeMIT no edificio do Centro de Servizos Sociais, na rúa Oriente nº 12. As persoas interesadas xa poden inscribirse en cemit.ponteareas@xuntal.gal ou no teléfono 634 238 962.
Os talleres terán prazas limitadas e contarán con todas as medidas de prevención.
O edil Benito Márquez anima a todos os mozos e mozas a participar nestas actividades que lles permitirán “achegarse á tecnoloxía e á robótica dun xeito ameno, divertido e práctico”.